早兩日親戚食飯時開住部電視，咁啱見到幾個港姐，於是有親戚指出冠軍係邊位，有位做老師嘅疏堂親戚講咗句，「原來係佢雀屏中選？勁呀！」跟住佢開始對住阿史「教書」，話雀屏中選係嚟自唐朝開國君主李淵射箭娶老婆嘅事跡，今日一於同大家分享吓。

話說李淵嘅夫人竇氏本身係北周大將竇毅個女，而北周武帝更加係佢舅父，所以竇氏自幼養於宮中，名副其實係身嬌肉貴。根據《舊唐書．高祖竇皇后傳》記載，無幾耐武帝娶咗個突厥公主為后，年紀輕輕嘅竇氏同皇帝舅父講，要多啲親近和親嘅突厥公主，咁先可以同突厥保持良好關係，意見獲得武帝接納。

後嚟隋文帝楊堅篡北周建立隋朝，宇文家族唔少人被誅殺，相傳竇氏講咗句「可恨我非男兒身，無法解決舅父一家災難」。爸爸竇毅聽完，覺得個女絕非池中物，要嫁個有返咁上下嘅人，於是佢响屏風畫咗隻孔雀，講明嚟求婚嘅人只要射中孔雀對眼，就可以抱得美人歸。

前後有幾十個人都射唔中（堅係難？），跟住男主角李淵「嗖嗖」兩箭就射中孔雀對眼，成為竇氏嘅老公。就係咁，之後大家就會用雀屏中選嚟形容脫穎而出、被受青睞嘅人喇。

劇照嚟自網絡。